Елбасының тапсырмасы жүйелі түрде жүзеге асуда!
2021 жылғы 27 қазан күні Ел Тәуелсіздігінің 30 жыл мерейтойының қарсаңында және «Жас маман» жобасы аясында Нұр-Сұлтан қаласы Жоғары көлік және коммуникация колледжінің базасында жаңа «ENERGY» HCTC техникалық және кәсіптік білімді жаңғырту құзыреттілік орталығының салтанатты түрде ашылу рәсімі өтті.
Қазіргі таңда елдің бәсекеге қабілеттілігі сапалы білім жүйесімен, сонымен қатар, азаматтарының білім-білік деңгейімен анықталады. Сондықтан білім беру саласы заман талабына сәйкес дамуы тиіс. Бүгінде еліміздегі техникалық және кәсіптік білім беделін көтеру - басты назарда.
Айтулы іс-шараның алғашқы сөзін қадірлі қонағымыз Нұр-Сұлтан қаласы әкімінің орынбасары Оралов Асхат Раздықұлы колледж ұжымы мен студенттерін құттықтап, жаңадан ашылған құзыреттілік орталық студенттердің бәсекеге қабілетті, мықты маман болып шығулары үшін аса пайдалы орталық екенін айтты. «Заманауи құрылғылармен жабдықталған оқу кабинеттері еліміздің әлеуетін арттыратын сапалы кадрлар даярлауда сондай-ақ, колледж мәртебесін көтеруде үлкен рөл атқаратыны анық» - деп өз құттықтауын арнады.
Салтанатты жиынның құттықтау сөзін алған ҚР БҒМ Техникалық және кәсіптік білім департаментінің директоры Насымжан Жамбекқызы Оспанова «ENERGY» орталығының салтанатты түрде ашылуымен барша жиналған қауымды құттықтады. Насымжан Жамбекқызы өз сөзінде «Жас маман» жобасының мақсаты колледждердің материалдық базасын жаңарту және білікті мамандарды даярлаудың халықаралық тәжірибесін енгізу болып табылатынын айтты. Құзыреттілік орталығында бітіруші түлектерге сұранысты арттыруға, кадрларды, WorldSkills кәсіби шеберлік конкурстарына қатысушыларды даярлауды неғұрлым жоғары деңгейде көтеруге мүмкіндік беретінін айтты.
Құрметті сөз кезегін алған «Талап» КЕАҚ Президенті Әбдіманап Елікбайұлы Бектұрғанов жаңа орталықтың студенттердің сапалы білім алуына берілген үлкен мүмкіндік екенін айта келе, ел экономикасына сапалы кадрлар даярлап жатқан Жоғары көлік және коммуникация колледжінің ұйымының жұмыстарына табыс тіледі. Әбдіманап Елікбайұлы сөзінің соңында ақылына ақы сұрамай, бар білгенін шәкірттеріне беріп жатқан колледж ұстаздарына өз алғысын жеткізді.
Шараның ресми ашылуына колледжіміздің 1984 жылғы түлегі қазіргі таңда «Қазақстан Темір жолы» АҚ президентінің кеңесшісі Саурбаев Қайрат Әбенұлы өзі білім алған 75 жылдық тарихы бар оқу орнының жанынан жаңадан ашылғалы тұрған орталықтың ашылуымен құттықтап, барша ұстаздар мен студенттерге ақжолтай тілегін білдірді.
Ашылу салтанатына арнайы келген ҚР Парламенті Мәжілісінің депутаты Бисенбаев Елнұр Сабыржанұлы өз сөз кезегінде «Жас маман» жобасы Тұңғыш Президент Нұрсұлтан Әбішұлы Назарбаевтың «Жастар – ел тірегі» ұлттық жобасының құрамына кіретінін, сондай-ақ бұл жобаның республика көлемінде атқарылып жатқанын сөзге тиек етті. Бүгінгі ашылу салтанаты осыған дәлел деп сөзін қорытындылаған халық қалаулысы ұстаздар мен студенттерге сәттілік тіледі.
Құрметті қонақтардың жылы лебізінен кейін құзіреттілік орталықтың ашылу рәсімі өтіп, лентасы қиылды. Орталыққа кірген қонақтар мен әлеуметтік серіктестер әр кабинетте орнатылған орталықтың заманауи құрал-жабдықтармен танысты.
Орталық төрт кешеннен тұрады, олар:
1. Электроника және электр машиналары зертханасы;
2. Электр станциялары мен желілерінің электр жабдықтарының интерактивті бағдарламалық-аппараттық кешені;
3. Компьютерлік тренажерлік кешендер және автоматтандырылған оқу курстары;
4. Электрмонтаждау зертханасы.
Ерекше тренажерлардың бірі "Қазақстан Темір Жолы" АҚ энергетикалық саласында пайдаланылатын нақты өндірістік объектіні негізге ала отырып, Мәскеу қаласы "Электр станциялары мен желілерінің тренажерлары" ТЭСТ АҚ әзірлеген тартымдық қосалқы станцияның тренажері болып табылады.
Бұл тренажерлар мамандардың штаттық режимді жоспарлау дағдыларын игеруіне және жабдықтың істен шығуы кезінде жылдам әрекет етуіне арналған (яғни, штаттық және апаттық жағдайларда сапалы жұмыс істей білу).
Ашылу салтанатына қатысқан қонақтар орталыққа жоғары баға беріп, білім алуға мол мүмкіндік бар екенін жеткізіп, колледж басшысына өз ризашылықтарын білдіріп, жұмыстарына сәттілік тіледі.
Айкынбаева Дина
