Қалалық «College CUP»
2021 жылдың 14 желтоқсаны күні Қазақстан Республикасы Тәуелсіздігінің 30 жылдығына орай Жоғары көлік және коммуникация колледжінің ұйымдастыруымен, «Жас Отан» ЖҚ Нұр-Сұлтан қалалық филиалының қолдауымен Нұр-Сұлтан қаласының колледж студенттері арасында өткен «College CUP» қалалық «Жайдарман» ойыны өткізілді. Байқаудың басты мақсаты жастардың рухани және мәдени құндылықтарын дамыту, шығармашылық қаблеттерін шыңдау және жас дарындарды анықтап қолдау. Колледжіміздің студенттері арасындағы байланысты арттырып, жастарға өзіндік орта қалыптастыруларына орай туғызу болды.
Сәні мен салтанаты жарасқан айтулы шараға елордалық 10 колледждің 13 командасы қатысып, көрермен алдында өнер көрсетті. Жайдарман ойындарының форматында өткен байқауда әр құрама өзіндік жаңаша ойын көрсетті. Аз уақыт ішінде көременнің көңілінен шығып, қазылардың сынына ұшырамаған командалар жүлделі орындарды иеленді. Сайысқа Жайдарман ойындарының Жоғарғы лигасында өнер көрсетіп жүрген, жақында ғана өткен Алматы ауданы әкімі кубогының иегері «Шабыт құрамасының» капитаны Төлеуғалиев Әзілбек, Жайдарман ойындарының Жоғарғы лигасында өнер көрсететін Сарыарқа құрамасының капитаны Абзал Орынбасар және «КТА» сайысының Жоғарғы лигасында өнер көрсетіп жүрген «Прайд» командасының белді ойыншысы Төрежан Әділбек қазылық етіп жас Жайдарманшыларды бағалады.
Тартысқа толы сайыстың нәтижесі бойынша жүлделі ІІІ-орынды «Байланыс» құрамасы иеленіп 20 000тг сертификаты және арнайы кубокпен марапатталса, ІІ-орынды «Фаворит» құрамасы ұтып алып 30 000тг сертификаты мен кубок иегері атанды. Ал байқаудың І-орынын және чемпиондық «College CUP» кубогын Жоғары көлік және коммуникация колледжінің «АКТК» құрамасы қанжығасына байлады. Жеңімпаз жастар 50 000тг сертификатымен марапатталды. Қалалық сайыстың «Үздік ойыншысы» ретінді тәжірибелі жайдарманшы Боранбаев Асылжан танылса, сайысқа қатысқан өзге командалар колледж директорының алғыс хатымен марапатталды.
Байқау соңында әділ қазы алқалары іс-шараны жоғары деңгейде өткізгендері үшін және талантты жастарға үлкен қолдау көрсеткені үшін колледж басшылығына зор алғысын білдірді.
Бақыт Ұланбек
